كشكول جعفر الخابوري الاسبوعي اغسطس ٢٠٢٣م

انا حصل معايا موقف غير عادي في مطروح ..

انا روحت انا و اولادي الصغيرين و مراتي البحر بالليل قولت نقعد نتعشي هناك و الجو جميل و دخلت بالعربيه علي البحر و انا مش شايف انها رمله ناعمة و نزلت و قعدنا و تمام التمام .. جيت و انا خارج برجع بالعربيه غرزت مني في الرمله و كل ما ارجع تغرز اكتر و مش عايز اقولك كنت عامل ازاي و يفكر في ايه من القلق علي ولادي وقت ما غرزت العربيه .. شافنا واحد من اهالي مطروح و مشي بعد 10دقايق لقيته اقسم بالله جايب معاه ميكروباص و عربية نيسان فيهم ناس نزلو و سلمو عليا و قالولي خلي عنك يا بشمهندس دي لعبتنا في الصحرا ( بهزار ) و نزلوا الحبل من عربيتهم و شالو الرمله و حفرو من جنب العجل و في حد منهم كان لابس جلبيه بيضه اتبهدلت و شدو العربيه و طلعوها و شكرتهم جدا جدا و حاولت اقوم باي حاجه معاهم و أديهم فلوس رفضو جدا و بشدة و بعزة نفس .. طبعا شكرتهم جدا جدا .. الغريب في الموضوع كله أنهم كانو بيعملوا ده و هما مبسوطين و هما فرحانين و عايزين يخدمو و يطلعو العربية و في واحد منهم جه جنب ولادي بعد ما نزلتهم من العربيه علشان يطلعوها قعد يلعب مع الأطفال علشان مايخافوش طبعا صعب تلاقي الاحساس ده في اي مكان تاني ..
أقسم بالله العظيم أهالي مطروح أجدع ناس و رجاله بجد ..
مش عارف أشكرهم ازاي ..
شكرا أطيب و اجدع ناس
خالص تحياتي و تقديري و احترامي لكم ..